June' 2014 :: Hepnatism Ke Ajeeb Tajarbaat

دل کاراز معلوم کرنا

نیند کے عالم میں معمول سے اس کا سب قلبی راز پوچھ سکتے ہیں بعد میں اسے کہہ دیں کہ ’’ جو کچھ آپ سے پوچھا گیا ہے، جاگنے پرآپ کو قطعی یاد نہ رہے گا‘‘۔

بے حسی پیدا کرنا

معمول کو خوب غافل کردیں اور اسے کہہ دیں کہ اس کے بازو میں قوت لامسہ نہیں ہے یا بازو کے کسی مقام پرپنسل سے گول نشان لگادیں اور کہیں کہ اس مقام کو میں نے سُن کر دیا ہے۔ اس مقام پر اب کوئی تکلیف محسوس نہ ہو گی۔ اس کے بعد آپ اس مقام پر سوئی سالم کی سالم چبھودیں گے تب بھی اس کو درد محسوس نہ ہو گا۔ کسی عضو کا آپریشن کرنا مطلوب ہو تو ایک اور تکنیک برتیئے۔ مریض کو گہری نیند میں مبتلا کرکے خالی رومال معمول کے ناک کے قریب لے جائیے اور اسے کہیے کہ تمہیں کلوروفارم سنگھایاجارہا ہے، اب تم بالکل بے ہوش ہوجائو گے اور آدھ گھنٹہ تک مطلقاً بے ہوش رہو گے۔
اس کے بعد معمول یقیناً کلورو فارم کے نشے میں آجائے گا، اس حالت میں اس کا ہر چھوٹا بڑا آپریشن آسانی سے ہو سکتا ہے۔

ٹیلیفون پرہپناٹائز کرنا

اس مشق کے واسطے ایسے شخص کو تلاش کریں جس پرآپ پہلے کئی بار عمل کرچکے ہوں۔ معمول سے کہیں کہ ٹیلیفون کاریسیور کان سے لگا کر کرسی پر بیٹھ جائے۔(اگر کھڑا رہے گا تو متاثر ہو کر گر پڑے گا)
پھر اسے وثوق سے کہیں کہ ایک منٹ کے اندر اندر وہ گہری نیند میں ڈوب جائے گا۔
اب آپ کاسر بھاری ہو رہا ہے
اب آپ پر نیند کاغلبہ ہے
اب آپ سو جاناچاہتے ہیں
آپ سو رہے ہیں
آپ سو چکے ہیں
آپ گہری نیند سو چکے ہیں، سخت گہری نیند

ڈاک کے ذریعہ ہپناٹائز کرنا

اس تجربہ کے لئے کسی ایسے شخص کو منتخب کریں جس پر آپ ۲،۳بار عمل تنویم کر چکے ہوں اور جو آپ سے بہت زیادہ متاثر ہو۔ ایک کاغذ کے ٹکڑے پر جلی حروف میں لکھیں

چند سکینڈ میں آپ سو جائیں گے

تمہارے سر میں گرانی ہے، تم سو رہے ہو، تم سو چکے ہو
’’شاد گیلانی ‘‘ …اپنا نام جلی حروف میں لکھیں تاکہ آپ کے نام سے متاثر ہوکر وہ فی الفور ہپناٹائز ہو جائے۔

جانوروں کو متاثر کرنا

جانوروں کی آنکھوںمیں گھور کر دیکھئے، کم ازکم 15منٹ تک… (مگر یہ مشق وہی کرسکتا ہے جس نے آنکھوں کی مشقوں پر عبور حاصل کرلیا ہو) اس کے بعد اس کے نتھنے پکڑ کر سر نیچے کی طرف کھینچئے اور لمبے لمبے سانس لے کر اس کے کان میں پھونکیئے، یہ عمل۲،۳بار کرنے سے وہ جانور آپ کے تابع ہو جائے گا، جدھرآپ جائیں گے وہ آپ کے پیچھے پیچھے دوڑے گا۔
درندوں پر بھی یہ عمل ہو سکتا ہے، اگر آپ درندوں کی آنکھوں میں آنکھیں ڈال کر 5منٹ تک دیکھ لیں گے تو درندہ آپ پر کبھی حملہ نہ کر سکے گا۔
یہ ساری باتیں آنکھوں کی بے پناہ مقناطیسی قوت حاصل کرنے کے بعد ہی حاصل ہو سکتی ہیں۔

عرصہ تک غافل رکھنا

معمول پر خواب غفلت طاری کردیں۔ اسے کہہ دیں کہ آپ چار دن رات غفلت کی نیند سوتے رہیں گے اور اس دوران نہ آپ کو بھوک لگے گی نہ پیاس اور نہ ہی کمزوری ہو گی۔
پھر ہر روز دن میں۴ بار اسے یہی ہدایت کرتے رہیں کہ تم خواب غفلت میں فلاں دن تک سوتے رہو گے۔ اس دوران نہ بھوک لگے نہ پیاس اور کمزوری بھی نہ ہو گی۔ یقین کیجئے کہ ایسا ہو گا اورمعمول مدت معینہ تک بلاشبہ خواب غفلت میں رہے گا اور اسے کوئی نقصان بھی نہ پہنچے گا۔

Follow @darulamalchisht

Subscribe for Updates